Institucionet e Serbisë vazhdojnë të lidhin marrëveshje për punë ndërtimore me kompaninë “Rad 028”, pronari i së cilës, Radulle Steviq, ndodhet nën sanksione nga Shtetet e Bashkuara prej pesë vjetësh. Sanksionet ndaj tij dhe kompanisë janë vendosur për shkak të lidhjeve me Millan Radoiçiqin dhe Zvonko Vesellinoviqin, si dhe për dyshime mbi përfshirjen në krimin e organizuar dhe korrupsion.
Sipas dokumentacionit të prokurimeve publike të analizuara nga Radio Evropa e Lirë, përveç dhjetë kontratave të reja të këtij viti, kompania nuk ka përfunduar më shumë se njëzet projekte të tjera që i ishin besuar më herët në zonat me shumicë serbe në Kosovë. Në terren nuk është vërejtur prania e punëtorëve apo makinerive, ndërsa nuk është konfirmuar nëse punimet që figurojnë zyrtarisht si të përfunduara janë kryer realisht.
Në Kosovë, Radulle Steviq përballet me akuza për pjesëmarrje në sulmin e armatosur në Banjskë dhe ndihmë ndaj Millan Radoiçiqit për pastrim parash përmes kompanive të tij. Megjithëse ndaj tij është lëshuar një fletarrestim ndërkombëtar, vendndodhja e tij mbetet e panjohur.
Beogradi zyrtar i ka hedhur poshtë akuzat e ngritura nga institucionet e Kosovës, ndërsa nuk ka kthyer përgjigje nëse Steviq ndodhet në territorin serb apo nëse ndaj tij janë hapur hetime vendore. Po ashtu, as kompania e Steviqit dhe as institucionet serbe nuk janë përgjigjur ndaj kërkesave për koment nga Radio Evropa e Lirë.