Deputeti shqiptar në Kuvendin e Serbisë, Shaip Kamberi, ka realizuar një sërë takimesh me përfaqësues të lartë amerikanë në New York, në kuadër të përpjekjeve për të adresuar vështirësitë me të cilat përballen shqiptarët në Luginën e Preshevës. Vizita u zhvillua në kuadër të delegacionit të kryeministrit të Kosovës, Albin Kurti.
Në takimin me kongresistin Mike Lawler, anëtar i Komisionit për Punë të Jashtme të Dhomës së Përfaqësuesve, u diskutua gjerësisht për pasivizimin e adresave të banorëve shqiptarë, praktikë e cila ndikon drejtpërdrejt në të drejtën e votës dhe pajisjen me dokumente identifikimi. Po ashtu, u ngrit çështja e nënpërfaqësimit të shqiptarëve në institucionet publike, që sipas Kamberit, mbetet në disproporcion me përbërjen demografike të zonës.
Në një tjetër takim, me kongresistin Joe Wilson, fokusi i bisedës u zgjerua edhe në çështje të tjera thelbësore për komunitetin shqiptar në Serbi, siç janë arsimi në gjuhën shqipe dhe mosnjohja e diplomave të lëshuara nga institucionet e Kosovës. Kamberi vlerësoi si të domosdoshme që këto problematika të trajtohen me prioritet në Komisionin e Helsinkit të ShBA-së, si dhe të ngrihen në komunikimet zyrtare me autoritetet në Beograd. Deputeti ritheksoi se Lugina e Preshevës duhet të jetë pjesë e pandarë e vëmendjes së politikës së jashtme ndërkombëtare.