Zyra amerikane për Kontrollin e Pasurive të Huaja në Departamentin e Thesarit (OFAC) ka zgjatur licencën e punës për Industrinë e Naftës së Serbisë (NIS) deri më 20 shkurt, konfirmoi më 23 janar kryetarja e Kuvendit të Serbisë, Ana Brnabiq.
"Kjo do të thotë se NIS dhe rafineria do të vazhdojnë të punojnë. Kjo blen kohë shtesë për qytetarët tanë, vendin dhe ekonominë", tha Brnabiq gjatë një konference për media në Kuvendin serb.
Siç raportoi Radio Televizioni i Serbisë (RTS), OFAC përmes një letre theksoi kushtet për zgjatjen:
- Transaksionet nuk përfshijnë subjekte amerikane apo sistemin financiar të SHBA-së;
- Nuk janë në emër ose për përfitim të subjekteve të tjera të sanksionuara, drejtpërdrejt apo tërthorazi, përveç NIS-it;
- Nuk përfshijnë aktivitete të tjera të sanksionuara sipas rregullores për sanksione për shkak të aktiviteteve të dëmshme të politikës së jashtme të Russisë.
NIS ndodhet nën sanksione amerikane për shkak se shumica e pronësisë së saj është në duart e kompanive ruse. Për heqjen e sanksioneve, administrata amerikane kërkon daljen e Russisë nga pronësia.
Grupi hungarez MOL konfirmoi më 19 janar se ka nënshkruar marrëveshje kornizë me Gazprom Neft për blerjen e 56.15% të aksioneve të NIS-it. Për përfundimin e transaksionit nevojitet pëlqimi i OFAC-ut.
Ministrja e Minierave dhe Energjisë së Serbisë, Dubravka Gjedoviq Handanoviq, deklaroi më 20 janar se NIS i ka paraqitur kërkesë administratës amerikane për zgjatjen e licencës, ndërsa negociatat po zhvillohen.
Licenca e mëparshme, e marrë tre javë më parë, skadon në mesnatë.