Ambasada e Shteteve të Bashkuara të Amerikës në Kosovë ka rikonfirmuar qëndrimin e saj për nevojën e diversifikimit të burimeve të energjisë në vend. Në një përgjigje për mediat, përfaqësuesit amerikanë theksuan se Uashingtoni zyrtar mbështet fuqimisht përdorimin e teknologjisë amerikane për gazifikimin e linjitit vendas, si dhe nxitjen e Kosovës për t'iu bashkuar tubacionit të Gazit të Lëngshëm Natyror (LNG).
Sipas njoftimit, kjo nismë është thelbësore për të përmbushur rritjen e kërkesës së energjisë në të ardhmen, për të rritur sigurinë energjetike dhe për të ulur varësinë e vendit nga importet e kushtueshme të rrymës. E ngarkuara me punë, Annu Pratipati, kishte parashtruar këtë kërkesë edhe gjatë një deklarate të bërë javën e kaluar.
Ambasada amerikane vlerëson se siguria energjetike e Kosovës varet nga përdorimi i të gjitha burimeve të disponueshme. Duke pasur parasysh deficitin aktual në prodhim, institucioni vlerëson se ky diversifikim do të garantonte furnizim më të sigurt për qytetarët.