Në diskutimin e mbajtur me temën “Shfrytëzimi i LNG-së Amerikane për Sigurinë Energjetike dhe Përafrimin Strategjik të Kosovës”, zyrtari i lartë amerikan, Dan Byers, vlerësoi rolin e thëngjillit si bazë aktuale e sistemit energjetik të vendit. Megjithatë, ai theksoi domosdoshmërinë e diversifikimit të burimeve për të përballuar rritjen e kërkesës për energji në të ardhmen.
Byers bëri të ditur se Shtetet e Bashkuara janë prodhuesi më i madh në botë i gazit natyror dhe se kapacitetet e eksportit të LNG-së pritet të shënojnë rritje të ndjeshme në vitet në vijim. Sipas tij, mbështetja për aleatët përmes furnizimeve të sigurta mbetet prioritet strategjik i qeverisë amerikane.
Diskutimi u fokusua edhe te kushtet teknike për realizimin e këtij objektivi. Byers nënvizoi se disponueshmëria e burimeve nuk është e mjaftueshme pa zhvillimin e duhur të infrastrukturës. Në këtë drejtim, ai kërkoi fokusim te:
• Zhvillimi i studimeve të fizibilitetit;
• Investimet strategjike në ndërlidhje rajonale;
• Diplomacia energjetike për sigurimin e korridoreve të transportit.
Oda Ekonomike Amerikane në Kosovë theksoi se planifikimi afatgjatë është thelbësor që Kosova të jetë e përgatitur për të shfrytëzuar mundësitë që ofron tregu i LNG-së, duke forcuar kështu stabilitetin energjetik të vendit dhe rajonit.