Sekretari i Shtetit i Shteteve të Bashkuara, Marco Rubio, njoftoi zyrtarisht nisjen e një fushate gjithëpërfshirëse me qëllim çmontimin e rolit të Gjykatës Ndërkombëtare Penale (GJPN). Sipas njoftimit nga Departamenti Amerikan i Shtetit (DASH), ky institucion përbën një kërcënim për sovranitetin e vendit, pasi pretendon autoritetin për të ndjekur penalisht zyrtarët dhe ushtarakët amerikanë.
Në deklaratën e tij, DASH theksoi se asnjë president amerikan nuk ka pranuar juridiksionin e kësaj gjykate mbi shtetasit e SHBA-së. Fushata synon çaktivizimin sistematik të aftësive operuese të GJPN-së, të cilën Uashingtoni e akuzon se po kërkon të bëhet një "arbitër global i papërgjegjshëm" që vepron mbi shtetet kombëtare.
Strategjia e ndërmarrë nga qeveria amerikane parashikon një sërë masash diplomatike. Pjesë e këtyre veprimeve do të jetë kontakti i drejtpërdrejtë nga nivelet më të larta të diplomacisë amerikane, përfshirë Sekretarin e Shtetit, zëvendësit e tij dhe ambasadorët, drejtuar shteteve të tjera. Qëllimi është evidentimi i rreziqeve që, sipas SHBA-së, paraqet GJPN-ja, duke kërkuar nga shtetet partnere që të tërhiqen nga ky institucion.