Departamenti i Drejtësisë i Shteteve të Bashkuara ka ndryshuar zyrtarisht klasifikimin e kanabisit, duke e zhvendosur atë nga kategoria 1, ku renditen substanca si heroina, LSD dhe ekstazia, në kategorinë 3, që përfshin barna me rrezik të moderuar ose të ulët, si ato me kodeinë. Ky vendim u njoftua më 23 prill 2026 dhe vjen pas një urdhri ekzekutiv të nënshkruar nga presidenti Donald Trump më 18 dhjetor të vitit të kaluar.
Ministri i përkohshëm i Drejtësisë, Todd Blanche, theksoi se ky ndryshim synon të inkurajojë kërkimet shkencore mbi sigurinë dhe efektivitetin e kanabisit, të zgjerojë aksesin e pacientëve në trajtime mjekësore dhe të lejojë mjekët të marrin vendime më të informuara. Ai njoftoi gjithashtu nisjen e një procesi administrativ të përshpejtuar për shqyrtimin e një riklasifikimi më të gjerë, duke filluar nga 29 qershori.
Megjithëse kanabisi mbetet i paligjshëm në nivel federal, tre të katërtat e amerikanëve jetojnë në shtete ku ai është i ligjshëm për përdorim mjekësor ose rekreativ, dhe në shumë prej tyre mund të blihet në dyqane të specializuara. Ky klasifikim i ri mund të ketë pasoja ekonomike të rëndësishme, duke lehtësuar kufizimet për kompanitë që kultivojnë ose tregtojnë kanabis.
Paraardhësi i Trump-it, Joe Biden, kishte shtyrë për depenalizim federal, por nismë e tillë nuk u realizua. Kanabisi u klasifikua në kategorinë 1 në vitin 1970, gjatë presidencës së Richard Nixon, në kuadër të luftës kundër drogave të paligjshme.