Shefi i ri i EULEX-it zhvillon takime në Kosovë

Shefi i ri i misionit të EULEX-it, Antero Lopes, ka zhvilluar këtë të enjte një sërë takimesh në Kosovë. Në një takim njohës me kryetarin e Listës Serbe, Zlatan Elek, dhe ekipin e tij, Lopes diskutoi çështje që lidhen me sundimin e ligjit. Ai rikonfirmoi përkushtimin e misionit për mbështetjen e sigurisë dhe të drejtave të njeriut për të gjitha komunitetet në Kosovë. Në anën tjetër, përfaqësuesit e Listës Serbe shprehën pretendimet e tyre mbi atë që e cilësuan si "dhunë institucionale" ndaj popullit serb. Ata denoncuan presione dhe veprime të kundërligjshme ndaj përfaqësuesve serbë dhe organeve komunale, duke argumentuar se këto zhvillime cenojnë sigurinë juridike, funksionimin e vetëqeverisjeve lokale dhe besimin e qytetarëve në institucione. Në një zhvillim të ndarë të po kësaj dite, Antero Lopes priti në qendrën e EULEX-it në Mitrovicë një delegacion të përfaqësive diplomatike të shteteve anëtare të Bashkimit Evropian në Kosovë, së bashku me ministrin e Punëve të Brendshme, Xhelal Sveçla. Pjesëmarrësit diskutuan rreth kontributit të Njësisë Policore të Formuar të EULEX-it në stabilitetin e vendit, veçanërisht sa i përket kapaciteteve për menaxhimin e turmave dhe trazirave në mbështetje të Policisë së Kosovës.