Kryeministri në detyrë i Republikës së Kosovës, Albin Kurti, priti sot në takim shefin e ri të Misionit të Bashkimit Evropian për Sundimin e Ligjit në Kosovë (EULEX), Antero Lopes. Kryeministri Kurti e uroi Lopes për detyrën e re dhe shprehu mirënjohjen për kontributin e vazhdueshëm të misionit EULEX në forcimin e sundimit të ligjit dhe monitorimin e sistemit të drejtësisë në Kosovë.
Diskutimet u përqendruan te domosdoshmëria e vazhdimit të monitorimit të performancës së institucioneve të drejtësisë. Një pjesë e veçantë e takimit iu kushtua trajtimit institucional të rasteve të dhunës në familje dhe dhunës me bazë gjinore. Kurti nënvizoi nevojën për një reagim të shpejtë dhe të koordinuar ndërmjet Policisë, Prokurorisë, gjykatave dhe institucioneve të tjera përgjegjëse, duke e vendosur mbrojtjen e viktimave si prioritet kryesor.
Lidhur me situatën e sigurisë, palët biseduan për rëndësinë e koordinimit të vazhdueshëm dhe shkëmbimit të informatave ndërmjet institucioneve të Kosovës, EULEX-it dhe partnerëve ndërkombëtarë. Kryeministri theksoi domosdoshmërinë e një vëmendjeje të shtuar ndaj rreziqeve potenciale, duke përfshirë këtu edhe mbrojtjen e infrastrukturës kritike.
Nga ana tjetër, shefi i ri i EULEX-it, Antero Lopes, konfirmoi përkushtimin e misionit për të vazhduar angazhimin përmes një dialogu konstruktiv me homologët e tij. Qëllimi i këtij bashkëpunimi mbetet avancimi i llogaridhënies institucionale, forcimi i drejtësisë dhe sigurimi i stabilitetit afatgjatë për të gjitha komunitetet që jetojnë në Kosovë.