Në aksin kombëtar Librazhd–Përrenjas, në afërsi të fshatit Dragostunjë, ka ndodhur një shembje e madhe. Një inxhinier i Administratës Rajonale të Rrugëve Shtetërore (ARRSH), i cili preferoi të mbetet anonim, deklaroi për "Monitor" se riparimi pritet të zgjasë një kohë të gjatë, në rastin më të mirë disa muaj, nëse ndiqen procedurat dhe standardet në fuqi.
Defekti kërkon një zgjidhje inxhinierike të re për stabilizim dhe riparim. Specialisti e cilësoi këtë dëmtim si më seriozin e ndodhur së fundmi. Sipas tij, ekzistojnë dy variante kryesore:
- Ndërtimi i një viadukti të ri, që kërkon kohë të gjatë dhe ndryshim projekti nga e para;
- Gërryerja deri në themelet e masës së dheut të shembur, pas së cilës krijohet një trase e re.
Kompania ANK, e kontraktuar për punimet, po konsideron variantin e dytë. Megjithatë, masa e shembur përfshin volume të mëdha pune, prandaj të gjitha opsionet kërkojnë disa muaj. Inxhinieri përmendi mundësinë e një kalimi emergjent, por theksoi se ai nuk do të jetë i sigurt për automjete të rënda dhe kamionë.
Sipas vlerësimeve paraprake, rrëshqitja është krejtësisht e induktuar dhe lidhet drejtpërdrejt me ndërhyrjet e fundit në zonë, përfshirë punimet për segmentet e autostradës së Korridorit VIII. Këto ndërhyrje kanë rënduar masivin shkëmbor, duke krijuar presion shtesë mbi strukturën ekzistuese të rrugës. Ato kanë ngarkuar shpatullat e rrugës dhe kanë gërryer themelet për shkak të përdorimit të materialit lumor, një zgjidhje e konsideruar e gabuar nga pikëpamja inxhinierike, që ka çuar në destabilizimin e terrenit.
Ura e shembur u ndërtua në vitin 1997 dhe gjendej në gjendje shumë të mirë para ndërhyrjeve të fundit. Kjo forcon lidhjen e dëmtimit aktual me punimet e reja në zonë. Eksperti paralajmëroi se stabilizimi i masivit dhe rikthimi i sigurisë do të kërkojnë kohë të konsiderueshme.