Shënohet 37-vjetori i Ligës Qytetare Shqiptaro-Amerikane në Prishtinë

Në Prishtinë u mbajt seminari me temë “Një Premtim i Mbajtur: AACL dhe Rruga e Kosovës Drejt Lirisë dhe Pavarësisë”, organizuar nga Fondacioni Shqiptaro-Amerikan dhe Shoqata e Miqësisë Kosovë-Izrael, në nderim të 37-vjetorit të themelimit të Ligës Qytetare Shqiptaro-Amerikane dhe Fondacionit Qytetar Shqiptaro-Amerikan. Ngjarja bëri bashkë personalitete për të reflektuar mbi kontributin shumëvjeçar për çështjen shqiptare.

Ish-kongresisti amerikan Joe DioGuardi, themelues i Ligës, ndau rrëfime mbi trashëgiminë e tij arbëreshe dhe motivimin për të kandiduar në Kongresin amerikan, si një domosdoshmëri për t’i dhënë zë çështjes shqiptare. Ai theksoi rëndësinë kritike të stabilitetit institucional në Kosovë, duke u bërë thirrje politikanëve për kompromise për zgjedhjen e presidentit. DioGuardi paralajmëroi se moszgjidhja e këtij ngërçi do të rrezikonte të ardhmen e shtetit, veçanërisht përballë mobilizimit të forcave serbe.

Në të njëjtin seminar, avokati Steven Powles adresoi punën e Dhomave të Specializuara të Kosovës në Hagë. Powles shprehu shqetësimin se ky është i vetmi tribunal ndërkombëtar që ndjek penalisht vetëm njërën palë të konfliktit. Nga ana tjetër, ai theksoi rolin e ish-presidentit serb, Sllobodan Millosheviq, duke e cilësuar atë si fajtor për krimet e luftës dhe tmerret e kryera në Kosovë nga forcat serbe dhe organizatat paramilitare.

Veprimtari Agim Aliçkaj vuri në dukje një nga arritjet historike të Ligës, organizimin e takimit midis presidentit Ibrahim Rugova dhe presidentit Bill Clinton në vitin 1994. Sipas Aliçkajt, ky takim ishte thelbësor për të dërguar një mesazh ndërkombëtar mbi rëndësinë strategjike të Kosovës për Shtetet e Bashkuara.