Shërbimi i Qeverisë për Punë të Përbashkëta dhe të Përgjithshme i Republikës së Maqedonisë së Veriut ka kërkuar falje zyrtare për një gabim në materialet promovuese të shpërndara në përfaqësitë diplomatike. Në fund të një blloku shënimesh, ishte e printuar një hartë ku Kosova paraqitej si pjesë e Serbisë, pa figuruar si shtet i pavarur.
Materiali në fjalë ishte i shtypur vetëm në gjuhën maqedonase dhe i shoqëruar me një hartë shumëngjyrëshe të Evropës. Kjo hartë ka shkaktuar reagime, pasi Kosova nuk figurote si shtet i veçantë, por ishte e përfshirë brenda territorit të Serbisë. Në një shkresë drejtuar Ambasadës së Kosovës, shërbimi ka shprehur falje të thellë, duke e cilësuar rastin si lëshim të paqëllimshëm dhe gabim teknik. Ai ka njoftuar se materiali do të tërhiqet menjëherë nga përdorimi.
Autoritetet e Maqedonisë së Veriut insistojnë se bëhet fjalë për një lëshim teknik. Megjithatë, ngjarja vjen në një kontekst politik të ndjeshëm. Për shembull, përfaqësues të lartë të qeverisë kanë përdorur në të kaluarën terminologjinë "Kosovo i Metohija", e cila lidhet me narrativën zyrtare serbe dhe nuk përputhet me qëndrimet ndërkombëtare. Gjithashtu, në disa libra shkollorë, prej të cilëve mësojnë edhe fëmijët shqiptarë, Kosova është paraqitur si pjesë e Serbisë në raste të ngjashme.