Federata e Futbollit të Sllovakisë ka njoftuar se të gjitha biletat për ndeshjen gjysmëfinale të plej-of-it Sllovaki-Kosovë janë shitur plotësisht. Përballja zhvillohet më 26 mars në Stadiumin Nacional të Bratislavës, në kuadër të kualifikimit për Kupën e Botës 2026.
Drejtori i federatës, Lukáš Donoval, u shpreh i kënaqur me interesin e madh të tifozëve. Ai deklaroi: «Jemi shumë të lumtur të njoftojmë se të gjitha biletat janë shitur. Kjo tregon qartë se ekipi nacional i Sllovakisë gëzon mbështetje të madhe dhe se kjo ndeshje është shumë e rëndësishme për tifozët tanë. Jemi të bindur se ata do të krijojnë një atmosferë fantastike në stadium».
Sipas Donovalit, stadiumi i mbushur do t’u japë lojtarëve energjinë e nevojshme për të performuar në nivelin më të lartë. «Stadiumi i mbushur mund t’u japë lojtarëve energjinë e duhur për të kaluar pengesat e vështira. Dua t’i falënderoj tifozët për interesimin e madh dhe përkrahjen. Së bashku jemi më të fortë», shtoi ai.
Stadiumi Nacional ka kapacitet prej 22 500 ulëseve. Të paktën 5 për qind e tyre janë rezervuar për tifozët e Kosovës, ose rreth 1 000 bileta. Tifogrupi «Dardanët» njoftoi më herët se biletat në sektorin e tyre ishin shitur. Nëse lirohen bileta nga rezervimet për partnerët, UEFA-në apo Federatën e Futbollit të Kosovës, ato do të vihen në shitje online.
Fituesi i ndeshjes Sllovaki-Kosovë do të përballet në finalen e plej-of-it më 31 mars me fituesin e përballjes Turqi-Rumani. Përfaqësuesja triumfuese siguron vend në Kupën e Botës 2026, që zhvillohet në Shtetet e Bashkuara, Kanadë dhe Meksikë.