Kryeministri Edi Rama bëri të ditur më 17 prill në rrjetet sociale rikonstruksionin e shkollës "22 Tetori" në Berat, e cila ofron kushte bashkëkohore për zhvillimin e orëve të mësimit.
Shkolla shërben për rreth 500 nxënës dhe mësues, me laboratorë modernë, hapësira sportive dhe komunitare. Në hapësirën e saj janë të integruara zonat për artin dhe zejet, duke e kthyer në një qendër komunitare që bashkon nxënësit, mësuesit dhe prindërit.
Ndër ambientet e reja përfshihen salla shumëfunksionale, bibliotekë, dhomë mjeku, hapësira për nxënësit me aftësi të ndryshme, palestër si dhe ambiente ndihmëse.
Arkitektura e shkollës plotëson ansamblin e qendrës së qytetit së bashku me sheshet e reja, rrugët e rehabilituara me kalldrëm dhe gjimnazin "Babë Dudë Karbunara".