Shkolla 9-vjeçare "Kolë Jakova", e vendosur te Bregu i Lumit në njësinë nr. 11 të Tiranës, është rikonstruktuar plotësisht për të shërbyer rreth 500 nxënësve. Kryetarja e komanduar e Bashkisë së Tiranës, Anuela Ristani, inspektoi ambientet e reja dhe u shpreh se shkolla është gati për të mirëpritur nxënësit.
Zona ku ndodhet shkolla është gjysmë informale, me banorë të rinj dhe të vjetër. Ndërtesa, e ndërtuar para shumë vitesh, nuk ishte rikonstruktuar më parë. Punimet përfshijnë rikonstruksionin e plotë të hapësirave ekzistuese, shtesa për ambientet sportive dhe mbështetëse si tualetet, dhomat e zhveshjes, si dhe sistemin e ftohjes dhe ngrohjes.
Anuela Ristani theksoi se shkolla posedon të gjitha kushtet e nevojshme, me hapësira të bollshme didaktike dhe rekreative. Pas përfundimit të mësimit, ambientet do të shfrytëzohen nga komuniteti. Procesi mësimor do të zhvillohet me standarde të njëjta si në qendër, ashtu edhe në periferi të Tiranës, falë infrastrukturës së kompletuar dhe mobilimit.
Administratori i njësisë nr. 11, Ilirjan Engjëlli, vlerësoi investimin dhe nënvizoi se kjo është shkolla e vetme në bllokun banimi me rreth 6000 banorë.