Shkolla 9-vjeçare "Ibrahim Hima" në fshatin Prush të Tiranës, në territorin e Njësisë Administrative Vaqarr, është rindërtuar plotësisht dhe ofron tani kushte dinjitoze për nxënësit dhe stafin mësimor. Gjatë inspektimit të zhvilluar më 4 maj, kryetarja e komanduar e Bashkisë Tiranë, Anuela Ristani, njoftoi se hapësirat janë trefishuar krahasuar me objektin e vjetër, i cili kishte vetëm 9 klasa, tualete jashtë dhe ishte shumë amortizuar.
Anuela Ristani theksoi se shkolla e re, e ndërtuar në 3 kate, ka kapacitet maksimal prej 330 nxënësish dhe lejon 30 nxënës për klasë pa mbingarkesë. Ky investim krijon kushte të reja, duke përfshirë laboratorë që nuk ekzistonin më parë, palestër moderne, sallë polifunksionale, bibliotekë, dhomë mësuesish, dhoma për mjekun dhe psikologun, si dhe hapësira për parashkollorë dhe kopsht.
Sipas Ristanit, më parë shkolla përpiqej të mbante ngarkesën e nxënësve nga fshatrat Prush dhe Gropaj, por mungesa e kapacitetit detyronte fëmijët të udhëtonin distanca të mëdha drejt shkollave të Kombinatit, të cilat janë ndër më të mëdhatë në Tiranë. Tani nxënësit do të jenë pranë banesave të tyre, me klasa moderne dhe ambiente të ngrohta sipas standardeve më të mira.