Në orët e para të mëngjesit të 26 shkurtit 2026, rreth orës 03:50, një mjet tip Range Rover u përfshi nga flakët në lagjen nr. 1 të Pogradecit, në afërsi të Capri Center. Automjeti, i cili ishte i parkuar, u shkrumbua thuajse plotësisht.
Mjeti rezulton në pronësi të Erion Maxharit, i njohur për policinë e Pogradecit. Ky i fundit ka precedente penale për vepra të ndryshme, përfshirë një arrestim në vitin 2018 për shpërdorim detyre si ish-polic në doganën e Qafë-Thanës. Gjithashtu, ai u arrestua gjatë ditës së zgjedhjeve për një konflikt fizik me një komisioner.
Grupi hetimor po kryen këqyrjen e vendit të ngjarjes dhe ka marrë kamerat e sigurisë nga zona për të zbardhur rrethanat. Autoritetet dyshojnë se zjarrvënia mund të jetë e qëllimshme, por shkaku i zjarrit nuk është konfirmuar ende zyrtarisht. Policia po punon për sqarimin e plotë të ngjarjes.