Shoqata “Bashkimi i Arbitrave Shqiptar të Futbollit” ka dalë me një reagim zyrtar pas deklaratave të trajnerit të Egnatias, Edlir Tetova, i cili ka kritikuar arbitrimin në disa ndeshje radhazi, përfshirë humbjen 0-1 ndaj Tiranës më 1 shkurt 2026.
Pas kësaj ndeshje, Tetova u shpreh se ekipi i tij kishte dominuar lojën, por ishte penalizuar nga vendime të padrejta. Ai theksoi se ishte ndeshja e katërt radhazi ku Egnatia nuk i ishte akorduar një penallti. «Kam shumë rezerva për arbitrimin. Jo çdo prekje në zonë për lojtarët e Tiranës është faull, ndërsa për ne loja vazhdon. Është shumë e turpshme», deklaroi ai, duke kërkuar drejtësi për të dy skuadrat.
Në reagimin e saj, shoqata shprehet e shqetësuar për deklaratat e përsëritura publike të Tetovës, të cilat vënë në shënjestër arbitrimin dhe dëmtojnë imazhin e arbitrave shqiptarë. Ato i cilëson si akuza të vazhdueshme dhe të pabazuara, që përbëjnë një përpjekje për të justifikuar rezultatet sportive duke transferuar përgjegjësinë jashtë fushës së lojës.
Shoqata nënvizon se arbitrimi ushtron detyrën me profesionalizëm dhe paanshmëri, në përputhje me rregulloren në fuqi. Ajo i bën thirrje klubit Egnatia të reflektojë mbi mënyrën e komunikimit publik dhe të kontribuojë në ruajtjen e klimës së respektit në futboll. Gjithashtu, u kërkon të gjitha klubeve të tregojnë përgjegjësi institucionale dhe të respektojnë rolin e arbitrave si pjesë e pandashme e lojës.
Bashkimi i Arbitrave Shqiptar të Futbollit deklaron se do të vijojë të mbrojë dinjitetin dhe integritetin e arbitrave shqiptarë.