Autoritetet gjyqësore në Turqi kanë ndërmarrë një operacion ndaj drejtuesve të arbitrimit të futbollit, duke ndaluar shtatë persona nën dyshimet për ndërhyrje të paligjshme dhe parregullsi në proceset zyrtare. Mes personave të ndaluar është edhe Ferhat Gundogdu, presidenti i Bordit Qendror të Arbitrave (MHK). Hetimi është transferuar nga Antalia drejt Prokurorisë së Përgjithshme në Stamboll për shkak të juridiksionit.
Sipas informacioneve të bëra publike, hetimet bazohen në shqyrtimin e dëshmive, raporteve të ekspertëve, të dhënave financiare nga MASAK dhe gjurmëve të komunikimeve. Në dosjen hetimore përfshihen pretendime se gjatë viteve 2022 dhe 2024 janë bërë ndryshime të parregullta në listat e arbitrave, përjashtime të pajustifikuara nga klasifikimi, si dhe ndërhyrje në sistemin e vlerësimit me pikë dhe atë të emërimeve.
Ministri Turk i Drejtësisë, Akın Gurlek, njoftoi se përveç ndalimeve, policia ka ushtruar kontrolle në banesat, vendet e punës dhe zyrat e personave të përfshirë. Mes të hetuarve, përveç Gundogdu, bëjnë pjesë edhe persona të tjerë të lidhur me strukturat e arbitrimit dhe shoqatat përkatëse, ndër të cilët:
• Ferdi Karadoruk, president i Degës së Stambollit të Shoqatës së Arbitrave dhe Vëzhguesve Aktivë;
• Ahmet Sahin, ish-zëvendëspresident i MHK-së;
• Sebahattin Sahin, anëtar i MHK-së;
• Yunus Yildirim, ish-anëtar i MHK-së.
Deri në këtë fazë të hetimit, nuk është regjistruar ndonjë reagim zyrtar nga përfaqësuesit e të ndaluarve lidhur me akuzat për presion ndaj arbitrave dhe falsifikim të dokumenteve zyrtare.