Shoqata e Fermerëve Kosovarë të Qumështit ka reaguar publikisht ndaj deklaratave të deputetes së Lëvizjes Vetëvendosje, Adriana Matoshi, e cila i ka etiketuar si "langareca" fermerët që protestuan një ditë më parë.
Përmes një reagimi publik, fermerët kanë shprehur kundërshtimin e tyre ndaj kësaj gjuhe, duke theksuar se ajo nuk i shkon për shtat një përfaqësueseje të qytetarëve në Kuvendin e Kosovës. "Ne si fermerë kemi vendosur që të mos i përgjigjemi askujt në lidhje me akuzat që po na bëhen, mirëpo nuk mund të qëndrojmë duarkryq përballë akuzave të deputetes Adriana Matoshi", thuhet në reagim.
Sipas përfaqësuesve të fermerëve, përdorimi i këtij termi "luan me djersën e shumë familjeve". Për këtë arsye, ata i kanë bërë thirrje publike deputetes Matoshi që t'i tërheqë fjalët e thëna.
Fermerët kanë ftuar publikisht deputeten Matoshi që të verifikojë personalisht pjesëmarrësit e protestës nëse ajo dyshon mbi legjitimitetin e tyre. Ata janë shprehur të gatshëm që deputetja të vizitojë secilin prej tyre në fermat përkatëse, për të parë nga afër aktivitetin e tyre bujqësor.