Shoqata Kombëtare e Transportit Qytetas dhe Shoqata e Transportit Urban dhe Interurban kanë ngritur shqetësimin për rritjen e çmimit të naftës, e cila po rrit kostot operative të operatorëve privatë të transportit qytetar. Kjo rritje prej 42 deri në 50 lekë për litër ka ndodhur brenda një jave dhe lidhet me nisjen e luftës në Lindjen e Mesme.
Në një letër drejtuar Ministrisë së Financave, Ministrisë së Infrastrukturës dhe Energjisë, Drejtoria e Përgjithshme e Tatimeve dhe bashkive, shoqatat kërkojnë vlerësimin e situatës dhe dhënien e kompensimit për shtrenjtimin e karburantit. Sipas tyre, transporti publik është shërbim me interes të lartë publik dhe karburanti përbën zë kryesor të shpenzimeve.
Operatorët furnizohen me naftë në shumicë nga Porto Romano. Deri më 27 shkurt, çmimi ishte 142-145 lekë me TVSH për litër, ndërsa tani arrin 187 lekë me TVSH. Analiza e faturave konfirmon rritjen e ndjeshme të kostove.
Në mungesë të masave, operatorët paralajmërojnë se do të detyrohen të ulin numrin e autobusëve në lëvizje, çka ndikon në funksionimin e jetës urbane dhe interurbane.