Shoqata Kombëtare e Transportit Qytetas dhe Shoqata e Transportit Urban dhe Interurban kanë dërguar letër ministrave të Ekonomisë Delina Ibrahimaj dhe të Infrastrukturës dhe Energjisë Enea Karakaçi, si dhe kryetares së komanduar të Bashkisë së Tiranës Anuela Ristani.
Ato paralajmërojnë se, për shkak të rritjes së kostove operative nga shtrenjtimi i karburantit dhe mungesës së reagimit institucional, nga java e ardhshme rrezikohet ndërprerja e shërbimit për rreth 450 linja të rregullta.
Në vend operojnë 235 operatorë të licencuar për këto linja. Në letër thuhet se, në mungesë të një ndërhyrjeje të shpejtë, operatorët nuk do të kenë mundësi financiare për të vazhduar aktivitetin normal.
Kjo vjen pas takimit të zhvilluar më 1 prill 2026, ku u premtua një takim vijues më 7 prill 2026, që nuk është mbajtur ende. Shoqatat nuk kanë marrë reagim zyrtar, informacion konkret apo qëndrim mbi trajtimin e kërkesave.
Kërkesa kryesore është dhënia e kompensimit, duke zbatuar skemën e vitit 2022. Në takimin e prillit është propozuar kompensim në vlerën 100 lekë për litër naftë. Përveç kësaj, nënvizohet nevoja për trajtim të akcizës, taksës së qarkullimit dhe TVSH-së, si dhe kostove të mirëmbajtjes e pjesëve të këmbimit.
Shoqatat theksojnë se zvarritja e vendimmarrjes e bën situatën të papërballueshme dhe rrezikon reduktimin e flotës, uljen e frekuencës së shërbimit dhe përkeqësimin e funksionimit të transportit publik.