Protesta e zhvilluar këtë të enjte përpara ndërtesës së Kuvendit është shoqëruar me tensione ndërmjet pjesëmarrësve dhe forcave të rendit. Gjatë këtij tubimi, policia ka ndërhyrë duke shoqëruar disa protestues, mes të cilëve antropologen gjuhësore amerikane Carrie Ann Morgan dhe artisten Elsa Paja.
Ish-deputetja e Partisë Socialiste, Ledi Shamku Shkreli, ka konfirmuar ndalimin e tyre në Komisariatin nr. 3. Përmes një reagimi në rrjetet sociale, ajo ka bërë thirrje për solidaritet, duke shkruar: “Po ti, nga cila anë e gardhit je?”.
Protesta, e cila kishte në fokus mbrojtjen e zonës Vjosa-Nartë, u karakterizua nga përplasje fizike, përdorim i gazit lotsjellës dhe sprajit me piper. Deri në këto momente, Policia e Shtetit nuk ka dalë me një njoftim zyrtar lidhur me arsyet e shoqërimit të aktivisteve apo me numrin total të personave të ndaluar.