Rreth orës 03:45 të mëngjesit të së enjtes, një shpërthim është regjistruar në një lokal në lagjen "Pavarësia 3" të qytetit të Vlorës. Sipas njoftimit zyrtar të policisë, në derën e lokalit, që është në pronësi të shtetasit G.P., ishte vendosur një sasi e dyshuar si lëndë plasëse.
Si pasojë e shpërthimit, janë shkaktuar dëme materiale në ambientet e biznesit. Gjithashtu, nga forca e shpërthimit është dëmtuar edhe një automjet që ndodhej i parkuar në afërsi të vendit ku ndodhi ngjarja. Fatmirësisht, nuk raportohet për persona të lënduar.
Menjëherë pas njoftimit, në vendin e ngjarjes kanë mbërritur shërbimet e Policisë së Vlorës dhe ekspertët kriminalistikë. Nën drejtimin e Prokurorisë, grupi hetimor ka nisur mbledhjen e provave për të bërë të mundur zbardhjen e rrethanave dhe identifikimin e autorëve të këtij akti.
Përditësime
Hetimet për shpërthimin me lëndë plasëse në një lokal në Vlorë po përqendrohen te pronari, shtetasi Granit Peci, ish-punonjës i Policisë së Shtetit. Ekspertët e kriminalistikës konfirmuan se lënda e përdorur është tritol, ndërsa grupi hetimor po analizon pamjet e kamerave të sigurisë për identifikimin e autorëve. Policia e Vlorës bëri me dije se, deri më tani, nuk ka asnjë person të shoqëruar në lidhje me ngjarjen.