Një shpërthim i fuqishëm shkaktoi zjarr gjatë natës në një qendër magazinimi të armëve në Bullgarinë qendrore, pranë fshatit Tsareva Livada. Flakët u përhapën nga një magazinë në tjetrën, ndërsa pamjet e incidentit u transmetuan nga mediat lokale. Guvernatorja e rajonit të Gabrovos, Kristina Sidorova, njoftoi se zjarri kishte përfshirë territorin e bazës së magazinimit dhe situata ishte në monitorim të vazhdueshëm.
Objekti i përket kompanisë bullgare të armëve EMCO, e cila drejtohet nga tregtari i armëve Emilian Gebrev. Ky është shpërthimi i dytë në një objekt të lidhur me këtë kompani brenda pak javësh, pasi një incident i ngjashëm u regjistrua edhe muajin e kaluar. Deri në këto momente, autoritetet bullgare nuk kanë përcaktuar ende shkakun e shpërthimit dhe nuk kanë konfirmuar zyrtarisht ndonjë lidhje me sabotimin.
Në të kaluarën, kompania EMCO ka qenë objekt i hetimeve të prokurorisë bullgare lidhur me disa shpërthime në depot e municioneve midis viteve 2011 dhe 2020. Autoritetet bullgare kanë pretenduar se në këto ambiente ruheshin municione të destinuara për eksport në Ukrainë dhe Gjeorgji. Në vitin 2024, prokuroria lëshoi urdhër-arreste për gjashtë shtetas rusë, të dyshuar për përfshirje në shkatërrimin e këtyre depove. Hetuesit kanë hedhur hipoteza për lidhje të mundshme midis shpërthimeve në Bullgari, tentativës për helmimin e Emilian Gebrevit në vitin 2015 dhe shpërthimeve në depot e municioneve në Republikën Çeke në vitin 2014. Nga ana e saj, Moska ka mohuar vazhdimisht çdo akuzë për përfshirje në këto ngjarje.
Përditësime
Guvernatorja Kristina Sidorova konfirmoi se zjarri ka nisur gjatë orëve të natës dhe po përhapet në mënyrë aktive nga njëra depo në tjetrën brenda bazës së magazinimit të EMCO.