Një shpërthim i fuqishëm ka shkaktuar zjarr në një objekt për ruajtjen e municioneve në Bullgarinë qendrore, i cili menaxhohet nga prodhuesi i armëve EMCO. Ngjarja ka ndodhur gjatë natës së të premtes pranë fshatit Tsareva Livada, ku flakët janë përhapur mes magazinave të kompanisë. Për arsye sigurie, autoritetet kanë urdhëruar evakuimin e personelit dhe rrethimin e zonës së prekur.
Guvernatorja e rajonit të Gabrovos, Kristina Sidorova, konfirmoi se zjarri është përhapur nga një depo në tjetrën. Megjithëse përmasat e dëmit mbeten të papërcaktuara, policia lokale bëri me dije se nuk ka rrezik për popullatën përreth. Menaxheri i objekteve të prodhimit të EMCO-s, Slavcho Dimiev, theksoi se objekti shërbente për ruajtjen e municioneve, duke përfshirë një sasi të vogël predhash të kalibrit të mesëm. Kompania ka përjashtuar mundësinë e gabimit njerëzor, ndërsa po shqyrtohen hipotezat e sabotimit.
Ministri bullgar i Brendshëm, Ivan Demerdzhiev, ka njoftuar nisjen e hetimeve zyrtare. Hetimi do të analizojë rastet e mëparshme të zjarreve në objektet e kësaj kompanie për të konstatuar nëse ekziston një model i përbashkët. Ndërkohë, kompania drejtohet nga tregtari i armëve Emilian Gebrev, i cili ka qenë objekt i hetimeve të mëparshme lidhur me incidente të ngjashme që nga viti 2011. Autoritetet kanë hulumtuar më parë mundësinë e përfshirjes së shtetasve të huaj në shpërthimet e objekteve të EMCO-s, ku municionet ishin të destinuara për Ukrainën dhe Gjeorgjinë.