Një zjarr me përmasa të mëdha ka rënë në ambientet e ish-Kombinatit Metalurgjik në Elbasan, duke përfshirë magazinën e fabrikës së prodhimit të detergjenteve dhe pecetave të lagura Optimal. Flakët janë përhapur me shpejtësi në godinë, duke shkaktuar shtëllunga të dendura tymi që kanë mbuluar zonën.
Autoritetet kanë këshilluar qytetarët që ndodhen pranë zonës të shmangin lëvizjet e panevojshme dhe ekspozimin ndaj tymit deri në normalizimin e situatës. Shërbimi Zjarrfikës i Elbasanit ka dërguar mjete dhe efektivë në vendngjarje, të cilët po punojnë në kushte të vështira për izolimin dhe shuarjen e flakëve, me synim parandalimin e përhapjes së tyre në objektet përreth.
Efektivë të Policisë së Elbasanit kanë mbërritur gjithashtu në vendngjarje, ku kanë rrethuar zonën dhe po koordinojnë operacionin për menaxhimin e situatës. Fabrika Optimal administrohet nga investitori turk Selim Guleç.
Deri në këto momente nuk ka njoftime zyrtare për persona të lënduar apo për shkaqet që çuan në rënien e zjarrit. Vlerësimi i dëmeve materiale pritet të kryhet pasi flakët të neutralizohen plotësisht.