Rreth orës 12:50, një vatër zjarri u regjistrua në një masiv me shkurre, ferra dhe bimësi të egër përgjatë shtratit të lumit Shkumbin, në afërsi të fushës së grumbullimit të mbetjeve pranë Inceneratorit të Elbasanit. Përhapja e shpejtë e flakëve shkaktoi shtëllunga të mëdha tymi, të dukshme nga distanca të largëta, duke ndotur ajrin në lagje të ndryshme të qytetit.
Banorët kanë raportuar një erë mbytëse dhe shqetësime për shëndetin publik, veçanërisht për fëmijët, të moshuarit dhe personat me probleme respiratore. Situata ka rikthyer debatin mbi ndotjen mjedisore në këtë zonë, e cila prej vitesh konsiderohet problematike.
Kjo ngjarje pason një tjetër zjarr të ndodhur një ditë më parë, kur një biznes në territorin e ish-Kombinatit Metalurgjik u përfshi nga flakët, duke shkaktuar gjithashtu ndotje të konsiderueshme atmosferike. Dy ngjarje të tilla brenda 24 orëve kanë shtuar shqetësimin e qytetarëve, të cilët kërkojnë ndërhyrjen e institucioneve për identifikimin e shkaqeve dhe monitorimin e cilësisë së ajrit.
Shërbimet zjarrfikëse po punojnë aktualisht për izolimin dhe shuarjen e flakëve në zonën e Bradasheshit.