Një vatër zjarri u shfaq mesditën e kësaj të diele pas Kodrës së Krastës, në periferi të qytetit të Elbasanit. Flakët u përhapën me shpejtësi, duke rrezikuar drejtpërdrejt dy banesa të zonës dhe duke alarmuar banorët, të cilët kërkuan ndërhyrjen e forcave zjarrfikëse.
Menjëherë në vendngjarje mbërritën forcat e shërbimit zjarrfikës, të cilët organizuan operacionin për izolimin e flakëve dhe krijimin e një perimetri sigurie. Në këtë ndërhyrje u angazhuan 3 mjete zjarrfikëse dhe 12 efektivë. Pas rreth 2 orësh përballje me zjarrin, ekipet arritën ta neutralizonin vatrën, duke shmangur përhapjen e mëtejshme drejt zonave të banuara.
Sipas njoftimeve zyrtare, nuk raportohet për persona të lënduar apo dëme në banesa. Autoritetet e qarkut të Elbasanit theksuan se rreziku nga zjarret mbetet i lartë për shkak të temperaturave të larta dhe bimësisë së thatë. Shërbimi zjarrfikës u bën apel qytetarëve që të tregojnë kujdes maksimal, të shmangin ndezjen e zjarreve në ambiente të hapura dhe të njoftojnë menjëherë shërbimin në numrin 128 nëse konstatojnë vatra të reja.