Një vatër zjarri ka përfshirë rreth një hektar sipërfaqe pyjore në fshatin Derstil, që i përket Njësisë Administrative Gjinar në Elbasan. Flakët, të cilat dyshohet se kanë nisur nga një grumbull mbetjesh, janë përhapur me shpejtësi për shkak të kushteve të terrenit dhe erës, duke vënë në rrezik objektet përreth.
Situata është vlerësuar si kritike për shkak se zjarri është afruar pranë një banese ku ndodhej një e moshuar, si dhe një biznesi që ndodhet në afërsi të vatrës. Banorët e zonës kanë qenë të parët që janë angazhuar për të frenuar përhapjen e flakëve dhe për të mbrojtur pronat e tyre. Pas ndërhyrjes së tyre, në vendngjarje kanë mbërritur shërbimet zjarrfikëse, të cilat kanë bërë të mundur izolimin e zjarrit.
Aktualisht, situata raportohet nën kontroll. Zjarrfikësit janë duke vijuar punën për shuarjen përfundimtare të vatrës dhe për të parandaluar çdo mundësi riaktivizimi ose përhapjeje të flakëve në sipërfaqe të tjera. Autoritetet përkatëse kanë nisur verifikimet për të përcaktuar shkaqet e sakta të rënies së këtij zjarri.