Një incident zjarri ka ndodhur në ambientet e jashtme të silosit të një fabrike druri në qytetin e Elbasanit. Flakët, të cilat rrezikonin të përhapeshin në pjesë të tjera të objektit, u vunë nën kontroll pas mbërritjes së forcave zjarrfikëse.
Në vendngjarje ndërhynë dy mjete zjarrfikëse si dhe një automjet me shkallë, të cilat arritën të izolojnë vatrën dhe të eliminojnë çdo rrezik të mbetur. Falë ndërhyrjes së shpejtë, dëmet materiale u mbajtën në nivele të kufizuara dhe situata u normalizua brenda një kohe të shkurtër.
Aktualisht, grupi hetimor ka nisur punën për zbardhjen e rrethanave të ngjarjes. Shkaku i rënies së zjarrit mbetet ende i paqartë dhe pritet të përcaktohet përmes hetimeve të mëtejshme.