Një 16-vjeçar rrezikoi të mbytej në zonën “Vaska e Marinës” në Shëngjin, më 29 prill 2026. I mituri rrëshqiti nga gurët e skalierës dhe, për shkak të problemeve shëndetësore, e kishte të vështirë të notonte.
Menjëherë pas njoftimit, shërbimet e Drejtorisë Vendore për Kufirin dhe Migracionin Durrës (DVKM Durrës) u nisën me mjet lundrues drejt vendngjarjes. Pas lokalizimit, efektivët i dhanë ndihmën e parë 16-vjeçarit dhe e transportuan me mjet lundrues në breg.
I riu u dërgua për ndihmë të specializuar mjekësore në spitalin rajonal të Lezhës, ku ndodhet në gjendje të mirë shëndetësore.
Policia e Shtetit thekson se ndërhyrja ka qenë e shpejtë dhe profesionale. Ajo fton qytetarët të njoftojnë menjëherë autoritetet në raste emergjencash në det apo territor.