Shtetasi Drilon Agolli, 41 vjeç, është shpëtuar gjatë orëve të mesnatës pas një operacioni kërkim-shpëtimi në zonën malore të Gopeshit, në njësinë administrative Moglicë. I riu kishte pësuar dëmtime të rënda trupore si pasojë e një rrëzimi nga shkëmbi, ndërsa ndodhej në mal për mbledhjen e çajit dhe bimëve medicinale.
Operacioni për nxjerrjen e të dëmtuarit nga terreni i vështirë u krye nga efektivët e policisë dhe forcat zjarrfikëse. Pasi u transportua fillimisht me barelë deri në një zonë të aksesueshme për mjetet e transportit, Agolli u dërgua me ambulancë drejt Spitalit të Traumës në Tiranë. Ai po vijon të marrë trajtim mjekësor të specializuar. Autoritetet po kryejnë verifikime për të zbardhur rrethanat e plota të kësaj ngjarjeje.