Shqipëria po konsolidohet si një destinacion konkurrues në tregun britanik të turizmit, duke u pozicionuar si një alternativë përballë destinacioneve tradicionale mesdhetare. Sipas gazetares Julie Delahaye në median "Daily Express", interesi është nxitur nga bukuritë natyrore, ujërat e kristalta dhe çmimet e përballueshme, të cilat janë promovuar gjerësisht në rrjetet sociale.
Ndër zonat më të kërkuara nga turistët renditet Ksamili, i cili vlerësohet për gjiret dhe ishujt e vegjël. Distanca fluturimi prej rreth tre orësh nga Britania e Madhe dhe klima me mbi 300 ditë me diell në vit, mbeten avantazhe kryesore për vizitorët.
Megjithatë, ekspertët nënvizojnë nevojën për qasje të matur nga ana e pushuesve. Amanda Mollentze nga kompania "Triangle Travel" vë në dukje se, ndonëse vendi ofron një përvojë të mrekullueshme, infrastruktura turistike është ende në proces zhvillimi. Sipas saj, Shqipëria ndodhet në fazat e para të pranisë në tregun e pushimeve të organizuara dhe do të nevojitet një periudhë kohore për arritjen e plotë të standardeve të pritura nga pushuesit ndërkombëtarë.