Ministri i Punëve të Brendshme i Shqipërisë, Besfort Lamallari, dhe homologu i tij nga Maqedonia e Veriut, Pançe Toshkovski, nënshkruan sot në Dibër marrëveshjen për zbatimin e sistemit One Stop Shop në pikat kufitare. Ky mekanizëm do të mundësojë kalimin e qytetarëve dhe mallrave përmes një kontrolli të vetëm, duke shmangur ndalesat e dyfishta.
Zbatimi i këtij sistemi pritet të nisë brenda muajit qershor në pikën kufitare të Qafë Thanës, ndërsa gjatë muajit të ardhshëm ky model do të shtrihet edhe në pikën kufitare të Bllatës.
Ministri Lamallari vlerësoi se ky model pasqyron filozofinë e bashkëpunimit evropian, ku kufijtë shndërrohen në ura lidhëse për zhvillimin ekonomik dhe social. Nga ana e tij, ministri Toshkovski theksoi se sistemi, i cili është zbatuar me sukses edhe me Kosovën dhe Serbinë, do të krijojë kushte më të favorshme për qytetarët dhe bizneset, duke rritur efikasitetin dhe sigurinë në pikat e kalimit kufitar.