Ministri i Brendshëm i Shqipërisë, Besfort Lamallari, zhvilloi një takim në Dibër me homologun e tij nga Maqedonia e Veriut, Panče Toškovski, ku zyrtarizuan marrëveshjen për zbatimin e sistemit të kontrollit kufitar me një ndalesë. Ky sistem është hartuar për të lehtësuar lëvizjen e qytetarëve, turistëve dhe bizneseve, duke reduktuar procedurat administrative në kufi.
Gjatë takimit, ministri Lamallari vlerësoi ndikimin e Rrugës së Arbrit, të cilën e cilësoi si një investim me vlerë kombëtare. Sipas të dhënave, kjo infrastrukturë ka ndikuar në rritjen e fluksit në Pikën Kufitare të Bllatës. Statistikat për pesë muajt e parë të vitit 2026 konfirmojnë kalimin e 700 mijë qytetarëve dhe 300 mijë automjeteve përmes kësaj pike, me një mesatare prej 4.600 udhëtarësh në ditë.
Zbatimi i sistemit me një ndalesë do të shtrihet në të katër pikat kufitare mes dy vendeve. Sipas autoriteteve, ky hap pritet të nxisë zhvillimin ekonomik, turizmin dhe të forcojë sigurinë ndërkufitare, në përputhje me standardet e integrimit evropian.
“Kur një kamion kalon më shpejt kufirin, fiton ekonomia. Kur një turist pret më pak në kufi, fiton turizmi. Kur një familje kalon më lehtë për të takuar të afërmit, fitojnë njerëzit. Dhe kur dy shtete punojnë si një ekip në kufi, fiton siguria e të gjithëve dhe e ardhmja jonë evropiane”, u shpreh ministri Lamallari.