Forcat e Armatosura të Shqipërisë dhe Garda Kombëtare e Ushtrisë së New Jersey-t zhvilluan javën e kaluar një stërvitje taktike artilerie në Fort Dix, New Jersey.
Lajmin e bëri të ditur Ambasada e Shteteve të Bashkuara në Tiranë përmes një njoftimi në rrjete sociale.
Stërvitja e quajtur “Call for Fire” synoi përmirësimin e gatishmërisë luftarake, ndërveprimin dhe aftësive në kuadër të NATO-s. Kjo ngjarje dërgon sinjal për thellimin e partneritetit ushtarak midis SHBA-së dhe Shqipërisë, si dhe për rolin e Tiranës në sigurinë rajonale.
Në njoftim thuhet se Programi i Partneritetit Shtetëror vazhdon të forcojë lidhjet afatgjatë midis dy vendeve në mbështetje të sigurisë rajonale dhe kolektive.