Rritja e një foshnje në Shqipëri është bërë një ndër proceset më të kushtueshme në kontinent, si në vlerë absolute, ashtu edhe në raport me të ardhurat e familjeve. Sipas të dhënave të përpunuara nga Euronews bazuar në analizën e Remitly për korrikun 2026, shpenzimet për produktet bazë gjatë vitit të parë arrijnë në 5,532 euro. Ky nivel kostoje përfaqëson 66% të pagës mesatare vjetore, duke e vendosur Shqipërinë pas Moldavisë, e cila kryeson me 88.8%.
Në vlerë nominale, kostoja prej 5,532 eurosh e rendit Shqipërinë si vendin e nëntë më të shtrenjtë nga 38 shtete të analizuara. Përpara Shqipërisë, në listën e vendeve me shpenzime më të larta për artikujt e foshnjave, renditen vende si Spanja (6,294 euro), Holanda (6,140 euro), Finlanda (6,066 euro), Suedia (6,025 euro), Zvicra (6,018 euro), Luksemburgu (5,665 euro), Italia (5,609 euro) dhe Lituania (5,563 euro).
Analiza thekson një hendek të dukshëm në fuqinë blerëse, pasi në ekonomitë e zhvilluara fatura vjetore për një fëmijë përbën një përqindje shumë më të vogël të pagës. Për shembull, në Zvicër, e njëjta shportë produktesh përbën vetëm 8% të pagës mesatare, ndërsa në Holandë kjo shifër është 9.4%. Përllogaritja përfshin 14 produkte esenciale të ndara në gjashtë kategori: ndërrimi i pelenave, shishet e ushqyerjes, qumështi formulë, pajisjet e gjumit, mjetet e transportit dhe veshjet.
Sipas studimit, në shkallë europiane, veshjet (30.3%), qumështi formulë (25.7%) dhe pelenat (24.5%) përbëjnë rreth 81% të totalit të shpenzimeve vjetore. Gjithsesi, raporti vëren se në këtë përllogaritje nuk janë përfshirë shërbimet e kujdesit si çerdhet, të cilat mund të ndikojnë më tej në buxhetin e prindërve.