Një sondazh i publikuar nga Instituti Amerikan Foreign Policy Research vendos Shqipërinë në vendin e dytë mes vendeve anëtare të NATO-s për gatishmërinë e qytetarëve për të luftuar për vendin e tyre. Sipas të dhënave, 69% e shqiptarëve thanë se do të ishin të gatshëm të luftonin nëse shpërthette një luftë.
Sondazhi, porositur nga Universiteti Riga Stradiņš në bashkëpunim me Qendrën për Studime Gjeopolitike në Riga, u zhvillua në shtator dhe tetor 2025, me mbi 31,000 të anketuar në nivel kombëtar në çdo vend anëtar të NATO-s. Pyetja e formuluar ishte: "Nëse do të shpërthente një luftë, a do të ishit të gatshëm të luftonit për vendin tuaj?"
Pesë vendet me përqindjen më të lartë janë:
- Turqia: 88%
- Shqipëria: 69%
- Suedia: 66%
- Finlandia: 64%
- Mali i Zi: 63%
Dhjetëshen e plotësojnë Greqia me 63%, Norvegjia me 61%, Lituania me 52%, si dhe Polonia dhe Sllovenia me nga 49%.
Vendet me nivele më të ulëta përfshijnë Italinë dhe Sllovakinë me nga 25%, Gjermaninë me 27%, Hollandën me 30%, si dhe Hungarinë dhe Republikën Çeke me nga 33%. Në SHBA dhe Kanada, përqindjet janë përkatësisht 37% dhe 39%.
Interesi për këtë temë është rritur pas pushtimit të Ukrainës nga Rusia në 2022, që theksoi rolin e moralit qytetar në rezistencë.