Sipas të dhënave të publikuara nga INSTAT për anketën e "Pushimeve dhe Udhëtimeve 2025", banorët e Shqipërisë të moshës 15 vjeç e lart realizuan gjithsej 4.5 milionë udhëtime, nga të cilat 97.6% për qëllime personale dhe 2.4% për biznes.
Destinacionet dhe motivet e udhëtimit
Lëvizjet jashtë vendit shënuan një rritje prej 14.3% krahasuar me vitin 2024, nxitur kryesisht nga zgjerimi i linjave ajrore me kosto të ulët. Destinacionet kryesore ndërkombëtare ishin:
• Italia (11.3%)
• Greqia (10.4%)
• Gjermania (4%)
• Turqia, Spanja dhe Mali i Zi (2.9%)
Për udhëtimet jashtë vendit, motivi kryesor ishte vizita te të afërmit dhe miqtë (52%), ndërsa brenda vendit mbizotëruan pushimet dhe koha e lirë (52.8%). Për lëvizjet brenda vendit, qarku i Tiranës ishte më i frekuentuari me 13.7%, pasuar nga Vlora (12.2%), Korça (7.3%) dhe Durrësi (7.3%).
Trendet e akomodimit dhe transportit
Raporti vë në dukje se përdorimi i apartamenteve me qira afatshkurtër u rrit me 5.9%, ndërsa akomodimi në hotele shënoi rritje me 5.6%. Transporti ajror ishte ndër më të përdorurit për udhëtimet ndërkombëtare, duke shënuar një rritje prej rreth 14%.
Shqiptarët qëndruan mesatarisht 5.3 netë për çdo udhëtim. Sezonaliteti mbetet i theksuar, ku gushti përqendroi 12.6% të totalit të udhëtimeve, i ndjekur nga qershori (10.9%), dhjetori (10.2%) dhe korriku (9.8%).