Shqipëria mori çmimin e parë “Future Fit Seal – Global Edition” në World Governments Summit në Dubai për Diella, ministrën e parë të bazuar në inteligjencë artificiale.
Ministrja e Ekonomisë dhe Inovacionit, Delina Ibrahimaj, mbajti fjalën në këtë samit, ku theksoi se Diella përfaqëson një hap guximshëm drejt përdorimit të teknologjive të avancuara në administratën publike. Ajo nënvizoi se Diella pasqyron vizionin e Shqipërisë për një model të ri qeverisjeje, ku inovacioni ndërton besim, teknologjia u shërben njerëzve dhe e ardhmja ndërtohet me përgjegjësi dhe qëllim të qartë.
Sipas Ibrahimaj, Diella dëshmon se lidershipi në inovacion nuk përcaktohet nga madhësia e vendit apo e buxhetit, por nga vizioni dhe guximi për të rishikuar modelet tradicionale të qeverisjes. Përmes saj, Shqipëria ka vendosur standarde që po frymëzojnë ndryshime edhe përtej kufijve të saj.
Ibrahimaj deklaroi se qeveria shqiptare po ndërton një administratë moderne dhe transparente. Ajo shtoi se do të vazhdojë të investojë në inovacion si shtyllë kyçe për përmirësimin e shërbimeve publike dhe forcimin e shtetit, për gjeneratat e sotme dhe ato të ardhshme.
Ky vlerësim ndërkombëtar motivon ecjen përpara me vendosmëri drejt një qeverisjeje të orientuar nga e ardhmja. Ministrja përmendi se prej dy ditësh merr pjesë në World Governments Summit, një platformë prestigjioze globale ku diskutohen inovacioni digjital dhe përfitimet e inteligjencës artificiale për qytetarët dhe biznesin, duke rritur transparencën, efikasitetin dhe cilësinë e shërbimeve publike.