Sipas statistikave të publikuara nga Eurostat, Shqipëria regjistron nivelin më të lartë në Europë për sa i përket rrezikut të varfërisë dhe përjashtimit social në zonat rurale. Ky tregues, që arrin në 54%, pasqyron një kontrast të thellë midis jetesës në fshat dhe në qytet, ku në zonat urbane përqindja është 37.6%.
Kriteret që përcaktojnë përfshirjen e individëve në rrezik varfërie janë:
• Të ardhurat mujore më të ulëta se 60% e mesatares kombëtare.
• Mungesat e rënda materiale ose sociale, si pamundësia për të përballuar shpenzimet e ngrohjes, faturat, ushqimin apo veshjet.
• Jetesa në familje me intensitet shumë të ulët pune, ku të rriturit punojnë shumë pak ose aspak gjatë vitit.
Ndryshe nga Bashkimi Europian, ku treguesi i varfërisë është i shpërndarë në mënyrë të njëtrajtshme (rreth 21% si në qytet, ashtu edhe në fshat), në Shqipëri vihet re një hendek i dukshëm. Në vendet e tjera të rajonit, shifrat janë më të ulëta:
• Maqedonia e Veriut: 25.9% në zonat rurale.
• Serbia: 14.7% në zonat rurale.
Ndërkohë, treguesi i përgjithshëm i rrezikut të varfërisë dhe përjashtimit social në rang kombëtar për Shqipërinë raportohet në nivelin 40.5%. Të dhënat e referuara nga Eurostat për Shqipërinë i përkasin vitit 2022, ndërsa statistikat e vendeve të Bashkimit Europian i referohen vitit 2024.