Shqipëria renditet ndër vendet me përqindjen më të ulët të grave gjyqtare në Europë, sipas statistikave të publikuara nga Eurostat për vitin 2024. Megjithëse gratë përbëjnë shumicën e trupës së gjyqtarëve profesionistë me 55%, ky nivel është ndjeshëm më i ulët se mesatarja e vendeve të tjera europiane dhe atyre të rajonit.
Krahasimi në rajon
Në hapësirën e Ballkanit Perëndimor, Shqipëria mban vendin e fundit për sa i përket pjesëmarrjes së grave në këtë profesion. Vendet fqinje shfaqin përqindje më të larta:
- Serbia: 73%
- Bosnjë dhe Hercegovinë: 64.8%
- Mali i Zi: 63.8%
- Maqedonia e Veriut: 61.4%
Diferenca mes Shqipërisë dhe Serbisë, e cila kryeson renditjen rajonale, është 18 pikë përqindje. Gjithashtu, vendi mbetet prapa shteteve fqinje të Bashkimit Europian, si Greqia me 75.5% dhe Kroacia me 72.3%.
Situata në Europë
Në shumicën e vendeve të Europës, profesioni i gjyqtarit dominohet dukshëm nga gratë. Sllovenia mban rekordin me 81.4%, e ndjekur nga Letonia me 79.7% dhe Luksemburgu me 73.6%. Në anën tjetër të renditjes, përqindje më të ulëta se në Shqipëri janë shënuar në vende si Islanda (43.1%), Irlanda (43.6%), Lihtenshtajni (45%) dhe Turqia (49.6%). Gjermania paraqet një ndarje thuajse të barabartë, ku gratë përbëjnë 50.7% të gjyqtarëve.