Kombëtarja shqiptare e futbollit e personave me aftësi të kufizuara intelektuale do të marrë pjesë në turneun ndërkombëtar "Genuine Cup 2026", që do të zhvillohet në Houston, Texas, SHBA, nga 26 korriku deri më 2 gusht. Ky përfaqësim shënon herën e parë që Shqipëria dërgon një ekip të tillë në një kompeticion të këtyre përmasave.
Ekipi, i përbërë nga 12 futbollistë të rinj, ka zhvilluar përgatitjet në "Shtëpinë e Futbollit". Projekti është realizuar në bashkëpunim të ngushtë ndërmjet Federatës Shqiptare të Futbollit (FSHF) dhe organizatës "Klubi Kombëtar i Prindërve të Fëmijëve me ÇSA & P.A.K / Autizmi Flet".
Ministrja e Shëndetësisë dhe Mbrojtjes Sociale, Evis Sala, së bashku me zv.presidentin e FSHF-së, Geri Çipi, dhe anëtarin e Komitetit Ekzekutiv të FSHF-së, Blendi Fevziu, vizituan sportistët gjatë një seance stërvitore përpara nisjes për në Shtetet e Bashkuara. Ministrja Sala vlerësoi nismën si një dëshmi të ndryshimit të politikave sociale, duke kaluar nga mbështetja ekonomike drejt integrimit aktiv në arsim, punësim, kulturë dhe sport.
Nga ana e tij, zv.presidenti i FSHF-së, Geri Çipi, theksoi rëndësinë e bashkëpunimit ndërinstitucional në promovimin e gjithëpërfshirjes përmes futbollit. Gjithashtu, Blendi Fevziu vlerësoi përkushtimin e të gjithë aktorëve të përfshirë në këtë projekt, duke nënvizuar rolin e sportit si një mjet për kapërcimin e barrierave shoqërore.