Sipas Raportit Botëror të Drogave 2026 (World Drug Report 2026), të publikuar nga Zyra e Kombeve të Bashkuara për Drogën dhe Krimin (UNODC), Shqipëria renditet ndër vendet kryesore për nisjen ose tranzitin e ngarkesave të heroinës në kontinentin europian. Ky vlerësim bazohet në rastet e sekuestrimeve të raportuara gjatë periudhës 2021-2024.
Në hartën statistikore të raportit, vendi ynë është kategorizuar në të njëjtin grup me disa vende të tjera europiane, si Turqia, Bullgaria, Greqia, Italia, Spanja, Franca, Belgjika dhe Holanda. Jashtë kontinentit, harta përfshin qendra të prodhimit dhe trafikimit si Afganistani, Irani, Pakistani, India, Kirgistani dhe Taxhikistani.
Raporti thekson se tregu global i opioidëve po kalon ndryshime të rëndësishme, të ndikuara nga ndalimi i kultivimit të drogës në Afganistan në vitin 2022. UNODC paralajmëron se ndryshimi i rrugëve të trafikut dhe metodave të operimit mund të çojë në zhvendosjen drejt opioidëve sintetikë, si fentanilet dhe nitazenet, ose substancave të tjera alternative.
Rritja e sekuestrimeve të kokainës
Përveç heroinës, harta e UNODC evidenton se Shqipëria bën pjesë në vendet europiane që shënuan rritjen më të fortë të sekuestrimeve të kokainës gjatë vitit 2024, duke regjistruar një dyfishim të sasisë së kapur krahasuar me periudhat e mëparshme.
Përditësime
Tregu global i opioideve po përballet me një çekuilibër të thellë për shkak të ndryshimeve në prodhimin e lëndëve narkotike. Sipas Zyra e Kombeve të Bashkuara për Drogën dhe Krimin (UNODC), rritja e prodhimit në Mianmar nuk po arrin të zëvendësojë rënien drastike të furnizimeve nga Afganistani. Si pasojë, ekspertët paralajmërojnë se trafikantët po orientohen drejt substancave jo-opioide, duke ndryshuar dinamikat e zinxhirëve të furnizimit në vendet kyçe të tranzitit, përfshirë Shqipërinë.