Sipas Raportit Botëror për Drogat 2026 të hartuar nga Zyra e Kombeve të Bashkuara për Drogën dhe Krimin (UNODC), tregjet e paligjshme globale janë duke kaluar një proces transformimi të shpejtë. Grupet kriminale po përdorin zhvillimet teknologjike, konfliktet dhe paqëndrueshmërinë globale për të krijuar rrugë të reja trafiku dhe për të ndikuar në tregje të pashfrytëzuara më parë.
Sipas statistikave të raportit, renditja e substancave më të përdorura në botë është:
• Kanabis: 256 milionë përdorues
• Opioide: 63 milionë përdorues
• Amfetamina: 32 milionë përdorues
• Kokainë: 25 milionë përdorues
• Ekstazi: 21 milionë përdorues
Një shqetësim kryesor mbetet zhvillimi i substancave sintetike. Në vitin 2024 janë identifikuar 755 substanca të reja psikoaktive, prej të cilave 118 janë raportuar për herë të parë, duke vështirësuar punën e autoriteteve për zbatimin e legjislacionit. Për shkak të ndalimit të kultivimit të opiumit në Afganistan, është vërejtur rënie e prodhimit të heroinës, megjithatë trafikantët janë orientuar drejt opioideve sintetike si fentanili dhe nitazenet.
Raporti vë në dukje se përdorimi i këtyre substancave është i ndërlidhur drejtpërdrejt me rritjen e kriminalitetit, dhunës, varfërisë dhe problemeve të shëndetit mendor, duke ndikuar negativisht në sigurinë globale.