Shqipëria është bërë zyrtarisht pjesë e nismës rajonale “EU4IP – Ballkani Perëndimor”, një bashkëpunim strategjik mes Bashkimit Europian, Zyrës së Pronësisë Intelektuale të Bashkimit Europian (EUIPO) dhe vendeve të rajonit, përfshirë Bosnje dhe Hercegovinën, Kosovën, Malin e Zi, Maqedoninë e Veriut, Serbinë dhe Moldavinë.
Ky program synon të mbështesë institucionet vendore në përafrimin e praktikave dhe legjislacionit me acquis communautaire, duke forcuar mbrojtjen e markave tregtare, patentave, dizajneve industriale dhe të drejtave të autorit. Nisma vjen në një moment kyç për Shqipërinë, në kuadër të procesit të negociatave për anëtarësim në Bashkimin Europian.
Drejtoresha e Përgjithshme e Drejtorisë së Përgjithshme të Pronësisë Industriale (DPPI), Maria Solis Kapedani, deklaroi se ky projekt do të shërbejë për modernizimin e sistemit të pronësisë intelektuale në vend. “Mirëpresim projektin EU4IP-WB si një hap të rëndësishëm për forcimin e ekosistemit të pronësisë intelektuale në Shqipëri dhe në të gjithë rajonin. Një sistem modern dhe efikas i mbrojtjes së pronësisë intelektuale është thelbësor për zhvillimin e inovacionit, rritjen e konkurrueshmërisë së bizneseve dhe afrimin e vendit me standardet europiane,” u shpreh Kapedani.
Nëpërmjet këtij projekti, institucionet shqiptare do të përfitojnë:
• Asistencë teknike për harmonizimin ligjor;
• Shkëmbim të ekspertizës profesionale;
• Mbështetje për forcimin e institucioneve të pronësisë intelektuale.
Sipas Bashkimit Europian, mbrojtja e krijimtarisë dhe shpikjeve përmes sistemeve të forta të pronësisë intelektuale mbetet shtyllë kryesore e ekonomive moderne. Drejtori Ekzekutiv i EUIPO-s, João Negrão, vlerësoi se ndërtimi i një sistemi të tillë është baza për krijimin e një shoqërie më inovative dhe të zhvilluar.