Shqipëria mirëpret për herë të parë zhvillimin e takimeve të Grupeve të Punës të Shoqatës Evropiane të Regjistrave të Biznesit (EBRA). Ky aktivitet zhvillohet në Tiranë në datat 24-25 mars dhe organizohet nga Qendra Kombëtare e Biznesit (QKB). Mbledh ekspertë dhe drejtues regjistrash biznesi nga e gjithë Evropa.
Takimet përfshijnë grupet e punës për të drejtën e shoqërive tregtare, të dhënat e hapura dhe pronarët përfitues. Ato trajtojnë çështje kyçe si transparenca, digjitalizimi dhe ndërveprueshmëria e sistemeve të regjistrimit të biznesit në Evropë.
Në fjalën e saj, Ministrja e Ekonomisë dhe Inovacionit Delina Ibrahimaj u ndal te progresi i Shqipërisë në regjistrimin dhe shërbimet për bizneset. "Sot, Shqipëria ofron një sistem tërësisht të digjitalizuar për regjistrimin dhe shërbimet e biznesit. Aplikimet kryhen online, proceset janë të shpejta dhe të standardizuara, ndërsa regjistrimi realizohet brenda 24 orëve. Ky transformim ka rritur efikasitetin, ka ulur kostot për sipërmarrjen dhe ka forcuar besimin te institucionet", tha ajo.
Ministrja theksoi se janë avancuar reforma ligjore për përafrim me acquis-in e Bashkimit Europian. Punojnë për përmirësimin e kuadrit për pronësinë përfituese, rritjen e transparencës dhe garantimin e aksesit në të dhëna të sakta. Shqipëria vlerësohet pozitivisht në indekset ndërkombëtare për efikasitetin administrativ dhe lehtësinë e të bërit biznes, duke u renditur midis vendeve më të avancuara në rajon.
Drejtori i Përgjithshëm i QKB-së Etugert Llazi vlerësoi rëndësinë e eventit. "Fakti që ky takim zhvillohet për herë të parë në Shqipëri përbën një moment të rëndësishëm dhe një vlerësim konkret për progresin e arritur në zhvillimin e regjistrave të biznesit. Digjitalizimi i proceseve ka dhënë rezultate të dukshme", deklaroi ai.