Skuadra kombëtare e Shqipërisë rikthehet sot në fushë për një ndeshje miqësore kundër Ukrainës. Sfida zhvillohet në Valencia, në stadiumin Estadi Ciutat de Valencia, duke nisur në orën 20:45. Kuqezinjtë janë zhvendosur nga Varshava në Valencia pas eliminimit nga playoff-i i Kupës së Botës.
Të dyja skuadrat kanë mbyllur rrugëtimin për në Botëror. Kjo ndeshje u shërben për të lënë pas humbjen e fundit dhe për t’i dhënë hapësirë lojtarëve që nuk kanë pasur minuta në sfidat e mëparshme.
Historiku i përballjeve
Shqipëria dhe Ukraina janë takuar 8 herë. Kuqezinjtë kanë 1 fitore dhe 1 barazim, ndërsa Ukraina ka 6 fitore.
- Përballja e parë: 1997, Ukraina fitoi 1-0 në "Qemal Stafa".
- Humbja më e thellë për Shqipërinë: qershor 2018, 1-4.
- Fitore e vetme e Shqipërisë: 1-2 në Ligën e Kombeve, kur ra në Ligën C.
Trajneri Silvinjo
Kjo mund të jetë ndeshja e fundit për trajnerin Silvinjo në krye të pankinës. Kontrata e tij përfundon në fund të muajit korrik, bashkë me rrugëtimin e planifikuar të Botërorit. I pyetur për të ardhmen, ai ka thënë se do ta respektojë kontratën deri në fund.