Një shtetas shqiptar 30-vjeçar u arrestua përsëri nga karabinierët në Silea të Italisë. Ai kishte thyer masat e arrestit shtëpiak, ku vuante dënimin me një byzylyk elektronik, dhe kishte dalë në rrugët e qytetit për të vazhduar aktivitetin e trafikimit të drogës.
Sipas autoriteteve italiane, i riu ka precedentë penalë. Arrestimi i parë ndodhi gjatë një kontrolli të zakonshëm nga karabinierët e stacionit lokal. Në shtëpinë e tij u gjet një grua 44-vjeçare, banuese në zonën e Trevisos.
Gruaja u kontrollua dhe rezultoi se mbante në çantë gati 60 gramë kokainë, 22 gramë hashash dhe 7.5 gramë heroinë. Oficerët vlerësuan se këto substanca narkotike ia kishte dhënë gruas pikërisht shqiptari, i dënuar më parë për krime të rënda.
Pas këtij incidenti, shqiptari u arrestua dhe u vendos në arrest shtëpiak, ndërsa gruaja u mbajt në paraburgim. Megjithatë, ai nuk respektoi masat kufizuese dhe u rikthye në aktivitetin e paligjshëm dy ditë më parë, çka çoi në arrestimin e ri.